A ti te palro mi tierra
En el dialecto Castúo
Pa icilte qu’eris mu güena
Y que pa ti me remúo.
Me pongu la capa en ristre
manque me paezca a un búho
y m’entregu a pregonalti
con mi corazón castúo
pa icirle a toa la genti
lo llevu aquí metío:
es un doló de l’ausencia
d’este querel tuyo y mío.
Naide, nadie jamás en el mundo
Podrá desatar el ñúo
d’este dogal que m’estruja
corazón, cuerpu y sentío.
Cuandu tuve que dejalti
era pardo y timorato,
Era jovin e impacienti,
mu curioso y testarrúo,
mu mendrugo y calabazo,
mu español y mu castúo,
pero siempri estuve al loro
d’este querel tuyo y mío.
Y no son sólu quereles
lo qu’al loro m’han tenío,
que jue tamién l’autovia,
El parlamiento y el río,
los pantanus y lah jesas,
La corcha y el regadío,
el ganao y la montenera,
el pimentón y el condío.
Ni tengu güertu ni jesa,
y, ni baluto o valdío,
ni viña, ni un cachu e casa,
ni tan siquiera un bujío,
pero tengu aquí en el alma
¡Chaparreras y terruños
derretíos!
El oló de los jumeros en la ropa
y l’arrañá de loh araos en el
sentío!
Me figuro que mos jicieron
con el barro remojao
en la rüea con los deos,
entri barreños y barriles,
entri cazuelas, botijas y
pucheros
u que tengamus
por causal algún parienti
de loh güenus tinajerus.
Algunoh de nusotros
habemus nacío entri jarah
y madroños
con caricias de pastores
y cabreros.
A nusotros mos jicieron con süor.
No pue sel nuestra nacencia
señoruca,
no pue sel que nuestrus padris
no jueran jornalerus,
no pue sel que nuestrus padris
no jueran campusinos,
porque jueron de la estirpe
labrantía
de Collaos y Camberos.
Hijos del descuaje con el sachu,
hijos de las jocis y del liendru,
cortaores de la encina
en plena jesa
y limpiaores de las miesis con el
biendro.
Semos pardos, los poetas
mus dijeron,
porque juimos campusinos,
descendientes de los machos
qu’otros días
conquistaron los tesoros,
las especias y los pueblus.
Porque llevamus asina en la piel
com’un coló
pardo, moreno, morao y verdinegru,
algu asina como el barro
de los llanus extremeños.
Semus juertis como toros
pero dulcis como el fruto del
cerezu.
Me paeci qu’una encina
nos nació en los ojos,
mu pa drento,
la retina mos paeci que lo
llaman,
no sabemus cuando ni por dondi
s’ametío,
ni por qué la llevamus tan
adrento.
¡Sabemus solamenti que mus ha
nació
sin abonu, sin agua y sin
istiercu,
lo mesmo que lah plantas de los
campos,
de los ricos campos extremeños!
***
Eladio San Juan Brasero.
